திருகோணமலை மாவட்டத்தின் தம்பலகாமம் மற்றும் கிண்ணியா பகுதிகளில் கால்நடைப் பண்ணையாளர்கள் நீண்டகாலமாக எதிர்கொண்டு வரும் மேய்ச்சல் நிலப் பிரச்சினைக்குத் தீர்வு காண்பதில் குறிப்பிடத்தக்க முன்னேற்றம் ஏற்பட்டுள்ளதாக பிரதியமைச்சர் அருண் ஹேமச்சந்திரா தெரிவித்துள்ளார்.
இதன்படி, சுமார் 46 ஆண்டுகளாகத் தீர்வின்றி நீடித்து வந்த தம்பலகாமம் கால்நடைப் பண்ணையாளர்களின் பிரச்சினைக்குத் தீர்வாக, கடவானை மற்றும் அட்டவானை குளங்களை அண்மித்த பகுதிகளில் கால்நடைகளை மேய்ச்சலுக்கு அனுமதிக்கும் நடவடிக்கைகள் முன்னெடுக்கப்பட்டுள்ளன. இதன் ஒரு பகுதியாக, பல கால்நடைக் கூட்டங்கள் ஏற்கனவே குறித்த பகுதிகளுக்கு கொண்டு செல்லப்பட்டுள்ளதுடன், ஏனைய கால்நடைகளையும் கட்டம் கட்டமாகக் கொண்டு செல்வதற்கான ஏற்பாடுகள் நடைபெற்று வருகின்றன.
2023ஆம் ஆண்டு முதல் இப்பிரச்சினைக்குத் தீர்வுகாண தொடர்ச்சியான முயற்சிகள் முன்னெடுக்கப்பட்டு வந்த நிலையில், மாவட்டச் செயலகம், கிழக்கு மாகாண ஆளுநர், மாவட்டச் செயலாளர் மற்றும் சம்பந்தப்பட்ட அரச திணைக்களங்களின் ஒருங்கிணைப்புடன் தீர்வுக்கான நடவடிக்கைகள் துரிதப்படுத்தப்பட்டுள்ளன. குறிப்பாக, 2026 நவம்பர் 5ஆம் திகதி சுற்றாடல் அமைச்சில் நடைபெற்ற கலந்துரையாடலும் இம்முயற்சிகளுக்கு வலுசேர்த்துள்ளது.
இதேவேளை, கிண்ணியா பகுதி கால்நடைப் பண்ணையாளர்களின் பருவகால மேய்ச்சல் தேவைகளைப் பூர்த்தி செய்வதற்காக, கந்தளாய் சீனித் தொழிற்சாலைக்குச் சொந்தமான பொருத்தமான காணிகளைப் பயன்படுத்துவதற்கான அனுமதிகளும் பெறப்பட்டுள்ளன. அதற்கமைய, கால்நடைகளை அப்பகுதிகளுக்கு மாற்றும் நடவடிக்கைகள் முன்னெடுக்கப்பட்டு வருகின்றன.
கால்நடைப் பண்ணையாளர்களின் வாழ்வாதாரத்தைப் பாதுகாப்பதுடன், சுற்றுச்சூழல், வனவளம், நீர்வளங்கள் மற்றும் ஏனைய சமூகங்களின் நலன்களையும் பாதிக்காத வகையில், சட்ட விதிமுறைகளுக்கு உட்பட்டு இத்திட்டம் தொடர்ந்து நடைமுறைப்படுத்தப்படும் என பிரதியமைச்சர் மேலும் தெரிவித்துள்ளார்.
