திருகோணமலை நகர கடற்கரையில் கடல் ஆமை ஒன்று இட்ட 81 முட்டைகள் வனஜீவராசிகள் பாதுகாப்புத் திணைக்களத்தின் துரித நடவடிக்கையால் பாதுகாப்பாக மீட்கப்பட்டு, பாதுகாப்பான குஞ்சு பொரிப்பு நிலையத்திற்கு மாற்றப்பட்டுள்ளன.
கடந்த திங்கட்கிழமை (16) இரவு, திருகோணமலை நகர கடற்கரையில் அமர்ந்திருந்த ஒருவர், கரைக்கு வந்த கடல் ஆமை ஒன்று முட்டையிடுவதைக் கவனித்துள்ளார். அப்பகுதியில் சுற்றித் திரிந்த நாய்களால் ஆமைக்கும் அதன் முட்டைகளுக்கும் ஆபத்து ஏற்பட்டிருந்த நிலையில், அவர் உடனடியாக நடவடிக்கை எடுத்து ஆமை பாதுகாப்பாக முட்டையிடுவதற்கு உதவியுள்ளார்.
ஆமை முட்டையிட்ட பின்னர் மீண்டும் பாதுகாப்பாக கடலுக்குள் சென்றுள்ளது. இந்த சம்பவம் தொடர்பான தகவல் மற்றும் காணொளி பகிரப்பட்டதைத் தொடர்ந்து, சம்பவம் குறித்து உடனடியாக திருகோணமலை வனஜீவராசிகள் பாதுகாப்புத் திணைக்களத்தின் உதவி பணிப்பாளர் திருமதி சாமிகா தென்னகோனுக்கு அறிவிக்கப்பட்டது.
இதனைத் தொடர்ந்து விரைந்து செயற்பட்ட வனஜீவராசிகள் பாதுகாப்புத் திணைக்கள அதிகாரிகள், ஆபத்தான நிலையில் இருந்த 81 கடல் ஆமை முட்டைகளையும் பாதுகாப்பாக சேகரித்து, பாதுகாக்கப்பட்ட குஞ்சு பொரிப்பு நிலையத்திற்கு மாற்றினர்.
கடல் உயிரினங்களை பாதுகாக்கும் பணியில் விரைந்து செயல்பட்ட வனஜீவராசிகள் பாதுகாப்புத் திணைக்கள அதிகாரிகளுக்கு பாராட்டுகளும் நன்றிகளும் தெரிவிக்கப்பட்டுள்ளன.

