திருகோணமலை – மொரவெவ பகுதியில் அமைந்துள்ள கந்தளாய் வனப்பகுதியில் நான்கு ஏக்கர் பரப்பளவில் சாகுபடி செய்யப்பட்டிருந்த கஞ்சா தோட்டம் ஒன்று சிறப்பு அதிரடிப்படையினரால் வெற்றிகரமாக கண்டுபிடிக்கப்பட்டு அழிக்கப்பட்டது.
இந்த நடவடிக்கை, சிறப்பு அதிரடிப்படை கட்டளை அதிகாரி மற்றும் பிரதி பொலிஸ் மா அதிபர் சமந்த டி சில்வாவின் வழிகாட்டலின் பேரில், திருகோணமலை சிறப்பு அதிரடிப்படை முகாமும் புல்முடா முகாமும் பெற்ற தகவலின் அடிப்படையில் முன்னெடுக்கப்பட்டது.
செயல்பாட்டின் போது, மொரவெவ சிறப்பு அதிரடிப்படையின் பொறுப்பதிகாரியான தலைமை பொலிஸ் பரிசோதகர் கீர்த்தி சின்ஹா, ஊழல் தடுப்பு பிரிவு மற்றும் சிறப்பு பணியக அதிகாரிகள் இணைந்து பன்குளம் பகுதியிலுள்ள வனப்பகுதியை முற்றுகையிட்டனர்.
மொரவெவ பொலிஸாரின் தகவலின்படி, இந்த கஞ்சா சாகுபடி மிக நுணுக்கமாகவும் திட்டமிட்டு காட்டின் ஆழ பகுதிகளில் மேற்கொள்ளப்பட்டிருந்தது. அதற்கமைவாக, சிறப்பு அதிரடிப்படையினர் கஞ்சா செடிகளை அழிக்கும் நடவடிக்கைகளை உடனடியாக முன்னெடுத்துள்ளனர்.
இந்தச் சம்பவம் தொடர்பாக இதுவரை யாரும் கைது செய்யப்படவில்லை எனவும் விசாரணைகள் தொடர்ந்து முன்னெடுக்கப்படுவதாகவும் பொலிஸார் தெரிவித்துள்ளனர்.
